|
 
I TESTI DELLE CANZONI
Jesce sole Luigi Ottaiano
Juè jesce sole dacce ‘sta luce, uè jesce sole e dacce ‘a vita
Nun nce fa’, sole spantecà, dacce na bona jurnata dà,
Vulimme luce e ‘a forza pe’ vivere e faticà,
cu la speranza ca oggi jesce e nce fai campà,
uè jesce sole dacce sta luce, uè jesce sole e dacce ‘a vita (a sfumare)
‘A nuvena Di Giacomo De Leva
Nu zampugnaro 'e nu paese 'e fora,
lassaje quase 'nfiglianza la mugliera...
Se partette pe' Napule 'e bon' ora
sunanno, allero allero: Ullèro, ullèro...
E ullèro, ullèro... Ma nun era overo:
'o zampugnaro, penzava ‘a mugliera...
e suspirava... e 'a zampogna,
'e suspire s'abbuffava... Ah...ah...
Cuccato 'ncopp''a paglia, 'o Bammeniello,
senza manco 'a miseria 'e na cuperta,
durmeva, 'mmiez’’a vacca e ‘o ciucciariello,
cu ll'uocchie 'nchiuse e cu 'a vucchella aperta...
E ullèro, ullèro... che bella faccella,
che bella resélla, faceva Giesù
quanno 'a Madonna cantava:
"Core mio, fa' nonna nonna..." Ah...ah...
Mmerz''e vintuno, 'e vintiduje d''o mese,
na lettera lle dettero ‘a lucanna...
'sta lettera veneva da 'o pagghiese
e sotto era firmata : Marianna...
"E ullèro, ullèro... sto bene in salute
e cosí spero sentire di te:
Sono sgravata... e duje figlie
aggio fatto, una figliata." Ah...ah...
E’ Natale pe’ tutte quante (poesia) Luigi Ottaiano
E’ Natale! che felicità!
E comm’a tutte ‘e piccerille
facimme pure nuie, ca simme gruosse,
quacche prumessa.
Però, nun facimme comm’’e criature
l’hamma mantenè pure
Nun pensamme solo a magnà
anzi, facimmele nzieme stu menù
Accummenciammo d’’o primmo!
Che nce facimme ?
Mettimme pace dint’’a famiglia
pure cu’ ‘e suocere d’’a figlia
Po nu sicondo raffinato.
Mettimme a posta ‘a cuscienza pe’ durmì quieto.
Levamme nciuce e mmiria, nasce Giesù!
firnimmela, promettimme e nun’o fà cchiù.
Mo nce vò nu cuntorno sopraffino:
nu vaso a chella ca nce sta vicina.
Vulimmece cchiù bene e primma
Luntano, che nce facimme ?
Pe frutta ?
è belle è fatta.
P’’e criature, nsieme ‘o solito regalo
nci mettimme a pazzià cu’ loro
E stutammela sta benedetta televisione
nci’’a purtato cultura, ma pure divisione
Facimme comm’a tanne
tutt’a tuorn’o fucularo, nzieme ‘e nonne
E pe fernì, nu dolce napulitano.
Mannamme nu pensiero a chi sta luntano.
A chi overo nun tene pe’ magnà
Che male ha fatte, c’adda suffrì.
‘A cena e Razzullo Luigi Ottaiano
Che se magnaie Razzullo la Notte Santa e và
la Notte Santa e và la Notte Santa e và
Comme sape regnere ‘a panza
chine ‘e ciociole ‘e frutta secca.
Fiche, noce, nucelle nfurnate
Cicere, prugne, castagne d’’o prete
Cuopp’ ’e dattere mandorle sfuse, comme vezziuso
Che se magnaie Cidonio la Notte Santa e và
la Notte Santa e và la Notte Santa e và
Comme sape regnere ‘a panza
comme azzanne na cosce ‘e pullo
Core, fecato, trippa e musso
Capre, pecore, cierve e gatte
Quaglie, papere, anitra, urzo, chist’è nu turzo
Che se magnaie Ruscellio la Notte Santa e và
la Notte Santa e và la Notte Santa e và
Comme sape regnere ‘a panza
chine ‘e pisce e capitune
Treglie, dientice, spigole e sarde
fritte e gambere e calamare
tunno, broro e purpe e alice, magna felice
Che se magnaie Benino la Notte Santa e và
la Notte Santa e và la Notte Santa e và
Comme sape regnere ‘a panza
se l’abboffa sule e schifezze
Latte, fravole, zeppole, mele
Cecatèlla, capriole e cerase
Panzarotte, frittura ‘e crocchè, e picchippò
Che se magnaie Armenzio la Notte Santa e và
la Notte Santa e và la Notte Santa e và
Comme sape regnere ‘a panza
comme scenne dint’’a cantina
Vino fravola, aglianico fino
Caciuttelle, ricotta e fave
Capecuolle, gattò baccalà e casatiello
Cozze, vongole e telline. Gruongo, cefalo e mafrune
Cecenielle, maruzze, ricciole. Secce, tracene, baccalà
Vermeciello, menesta, gnocchi. Maccarune, purpette, pere
Faraona, cinghiale, fungie. Torte, struffole, roccocò
Cannellone, allesse, vope. Mazzancoglie, salame, pizze
Zompa, strummolo, guainella. Mazza, pivezo, cavaliè
Pummarole, aglio, cepolle. Mulignane, pepe, fagiole
Zucca, cavole e carote. Pignulate, birra, gattò
Na frittata sasicce uova. Rigatune fatt’à ragù.
Puparuole, cappere e aulive. Pasta, zucchero e cafè
Raffiuole, pastiera, babbà. Falanghina, asprigno, vino
Cernie, scuorfene, piscatrice. Continuamme a strafucà.
Fino a crepà.
‘O ciaramellaro a Napule Raffaele Viviani
Oj mamma, aggio perduto ‘o zampugnaro
Tenevo ‘o mana soia dint’’o cazone
Appena asciuto for’’a stazione
Me vaco pe’ tastare: addio cumpare
Sta Napule, de gente è accussì chiena
Ca se po cammena’ sulo attaccate
Nu sacco ‘e solde pe’ venì, sprecate
E me ne torno senza na nuvena
Mo va a sapere pe’ qua quartiere
pozzo vedere che dispiacere
Uh! St’alleccuto s’è nzallanuto
nfromme è venuto se s’è sperduto
chillo ccà steva s’io ccà o tenevo
pecchè ‘o sapevo che ccà ‘o sperdevo
Mo’ a Munteforte me danno à morte no!
Io songo forte l’aggi’à truvà
Sentenno à voce de la ciaramella
S’accosta à via d’o suono e forse vene
Ma d’oggi in poi, primm‘attaccà ‘e nuvene
Ce attaccarrammo cu na funicella
E intanto se fa notte e nun se vede!
Madonna, damme tu forza e curaggio
Nun tengo manco ‘e solde p’’o viaggio
Stasera a lu paese vaco a ppede
Mo siente a Mena che cantilena
chella è na jena piglia e me mena!
Vaje pe’ sunare pierde ‘o cumpare
sì nu sumare te l’hagghì à dire
e so’ mazzate bene assetate
so cunfessat’e cumunicate
e quanto scuorno p’’a ggente attuorno no!
Io nun ritorno l’aggì ‘a truvà
Cumpà, mannaggia zieta m’hè sentuto?
Tre ore ca te cerco, maccarone
Appriesso a me cu à mano int’ò cazone
Me tasto e nun te trovo.Addò si ghiuto
Piglià na funa avimma stà attaccate
comme ‘a galline, anfino a che turnammo
S’è fatto notte sona accumminciamme
pecchè se sona sempe ‘e ‘sti ghiurnate
Pa li sunate Mmiez’a li strate
simme chiammate e accaparrate
scioscia a zampogna piede e melogna
meh a ogna a ogna ch’è na vriogna
Miettate avante sona cca ’nnante
falle p’’e Sante nun me dà schiante
Sta Mmacculata ca sta appicciata
Vo na sunata c’avimma fa!
La Strada di Giuseppe e Maria da Perrucci di Ottaiano
Maria Non ti partir o vision bella e beata
Giuseppe Da me così svanì sogno funesto
Maria Giuseppe questo nostro breve sogno
O quanto rimirai gloria e splendori
Giuseppe In si corto riposo o mia Maria
O quante m’imgombrar larve e timori
Maria Bench’io vidi una pianta forte altera
Con balsami dar vita a mortali
Incombere alle palme ed agli allori
Dar frutti preziosi, sette spine
Al petto davan mio sette ferite
All’anima erano piaghe gradite
Giuseppe Parea di mirar un gran pastore
Mi dasse in custodia un agnellino
E mentre quello mi stringea nel petto
E tutt’amore tutto lo mio affetto
Un fier dragone, un forte leone
Scappavo dalle tenebre alla luce
Maria E sogni non son caro mio sposo
Quel che ne mostra il ciel il tempo è giunto
Che sì vedranno alfin lacci recisi
Di rotti ceppi salvi o mostri uccisi
Giuseppe Or che siam ristorati su cammina
Che questa di Betlem parmi la strada
Maria Farò ciò che ti aggrada o mio Giuseppe
Giuseppe Ed io cammin la via o mia Maria
Maria E nella strada incerta per Betlemme
Giuseppe Andiam diritti noi senza fremme
Maria L’impero dove ne conduce e porta
Giuseppe Il ciel duce ne sia
Uniti G.M. Gli angel di scorta
La leggenda del lupino Anonimo
A Betlemme se jttaie lu bando contra a criture sotto a li duie anne
Fui Maria e cu nu gruosso schianto lu figlio arravugliato dinta lu manto
E li giudei nun anno arricietto a ogni mamma sbatte lu core mpietto
A A A fuie Maria va pe la campagna
A A A ca l’angelo da cielo l’accumpagna
Oilloco lu giudeo cu na brutta faccia le vo levà lu figlio da li braccia
tremma Maria e corre senza ciato lu Bambeniello zitto e appaurato
E attuorno attuorno nu ncesta riparo sulo cielo scupierto e tiempo amare
A A A corre Maria ca o tiempo s’avvicina
A A A corre e annascunno a Gesù Bambino
Quanno a Maronna persa se vedette a ogni fronna aiuto aiuto dicette
Frutte e lupino mio frutte e lupino arapate e annascunno lu mio bambino
vattenne lu lupino rispunnette e forte forte li fronne sbattette
A A A lupino ca tu fusto amaro assaje
A A A sempe chiù amaro tu addeventarraie
E doppo ca lu lupino se nzerraie Maria a n’albero e pigno tuzzuliaie
Frutte e pignuole mie frutte e pignuolo arapate e annascunno lu mio figliolo
E’ subito lu pignuolo s’arapette e a mamma e a figlio nzino annascunnette
A A A reparete reparete Maria
A A A ca li giudei so ghiute pe n’ata via
E doppo ca lu bambino se salvaie cu la manella santa lu carezzaie
Pignuolo ca puoz’essere beneritto ca reparasta a via zitto zitto
si oggi buono avviste lu core d’ingenzo santo purtarraie l’addore
A A A e donna e lu bambino se salvaie
A A A na mana piccerella nce lassaie
A A A pignuolo ca tu a Dio t’arapiste
A A A nce purtarraie la mano de Gesù Cristo
Lacreme napulitane Bovio Buongiovanni
Mia cara madre, sta pe' trasí Natale,
e a stá luntano cchiù mme sape amaro....
Comme vurría allummá duje o tre biancale...
comme vurría sentí nu zampugnaro!...
A 'e ninne mieje facitele 'o presebbio
e a tavula mettite 'o piatto mio...
facite, quann'è 'a sera d''a Vigilia,
comme si 'mmiez'a vuje stesse pur'io...
E nce ne costa lacreme st'America a nuje Napulitane!...
Pe' nuje ca ce chiagnimmo 'o cielo 'e Napule,
comm'è amaro stu ppane!
Mia cara madre, che só', che só' 'e denare?
Pe' chi se chiagne 'a Patria, nun só' niente!
Mo tengo quacche dollaro, e mme pare
ca nun só' stato maje tanto pezzente!
Mme sonno tutt''e nnotte 'a casa mia
e d''e ccriature meje ne sento 'a voce...
ma a vuje ve sonno comm'a na "Maria"...
cu 'e spade 'mpietto, 'nnanz'ô figlio 'ncroce!
E nce ne costa lacreme st'America
a nuje Napulitane!...
Pe' nuje ca ce chiagnimmo 'o cielo 'e Napule,
comm'è amaro stu ppane!
Mm'avite scritto ch'Assuntulella chiamma
chi ll'ha lassata e sta luntana ancora...
Che v'aggi''a dí? Si 'e figlie vònno 'a mamma,
facítela turná chella "signora".
Io no, nun torno...mme ne resto fore
e resto a faticá pe' tuttuquante.
I', ch'aggio perzo patria, casa e onore,
i' só' carne 'e maciello: Só' emigrante!
E nce ne costa lacreme st'America
a nuje Napulitane!...
Pe' nuje ca ce chiagnimmo 'o cielo 'e Napule,
comm'è amaro stu ppane!
Buono Natale (poesia) Salvatore Di Giacomo
Teresì, buono Natale!
Penza, oinè, ca ‘o Bammeniello
fattose ommo è tale e quale
comm’ a ll’ate, grussiciello,
‘ncopp’’o munno scellarato,
senza fa’ male a nisciuno,
secutato e maltrattato,
‘ncroce, oi né, jette a fernì!
E ‘st’esempio ca te porto,
Teresì, tienilo a mmente,
ca pur’io, ‘nnucentamente,
chi sa comme aggia murì!
Nun vo’ sentere ‘sta voce
ca piatà, piatà te cerca:
e mme staje mettendo ‘ncroce
comm’’o povero Giesù…
Ma io nun so’ fatto e ‘mpastato
cu ‘sta pasta, mò nce vo’:
Isso – sempe sia ludato –
Isso nasce ogn’anno: io no!
’O zampugnaro nnammurato Armando Gill
Nu bellu figliulillo zampugnaro,
che a Napule nun c'era stato ancora,
comme chiagneva, 'nante a lu pagliaro,
quanno lassaje la 'nnammurata fora
E a mezanotte, 'ncopp'a nu traíno,
pe' Napule partette da Avellino...
Ullèro - ullèro... buono e sincero...
Da lu paese, a Napule arrevato,
nce cammenava comm'a nu stunato...
E succedette ca, na bella sera,
jette a suná a la casa 'e na signora:
Tappéte, luce, pavimente a cera...
ricchezze maje nun viste anfin'a allora!
Ma se 'ncantaje, cchiù assaje de sti rricchezze,
'e ll'uocchie d''a signora e de li ttrezze...
Ullèro - ullèro... fuje nu mistero:
Quanno jette pe' vasá â signora 'e mmane:
"Zitto, - sentette 'e dí - viene dimane!..."
Na casarella 'mmiez'a li mmuntagne,
nu fucularo cu nu cippo 'e pigne...
'A neve sciocca e na figliola chiagne:
Chisà stu lietto 'e sposa si se 'ncigna.
P''a strada sulitaria d'Avellino
nun sta passanno manco nu traíno...
Ullèro - ullèro... "Cagna penziero!..."
Sta sotto a nu barcone abbandunato .
Poveru zampugnaro 'nnammurato!...
La notte santa e Alleluja (melologo popolare) Gozzano Ottaiano
-Consolati, Maria, del tuo pellegrinare!
Siam giunti. Ecco Betlemme ornata di trofei.
Presso quell’osteria potremo riposare,
ché troppo stanco sono e troppo stanca sei.
Il campanile scocca lelentamente le sei.
Avete un po’ di posto, o voi del Caval Grigio?
Un po’ di posto per me e per Giuseppe?
Signori,ce ne duole:è notte di prodigio;
son troppi i forestieri;le stanze ho piene zeppe
Il campanile scocca lentamente le sette:
Oste del Moro, avete un rifugio per noi?
Mia moglie più non regge ed io son così rotto
Tutto l’albergo ho pieno, soppalchi e ballatoi:
tentate al Cervo Bianco,quell’osteria più sotto
Il campanile scocca lentamente le otto.
O voi del Cervo Bianco, un sottoscala almeno
avete per dormire?non ci mandate altrove
S’attende la cometa.Tutto l’albergo ho pieno
d’astronomi e di dotti,qui giunti d’ogni dove
Il campanile scocca lentamente le nove.
-Ostessa dei Tre merli, pità d’una sorella!
Pensate in quale stato e quanta strada feci!
-Ma fin sui tetti ho gente: attendo la stella.
Son negromanti, magi persiani, egizi, greci
Il campanile scocca lentamente le dieci.
Oste di Cesarea.Un vecchio falegname?
Albergarlo?Sua moglie?Albergarli per niente?
L’albergo è tutto pieno di cavalieri e dame:
non amo la miscela dell’alta e bassa gente
Il campanile scocca le undici lentamente.
La neve! Ecco una stalla! Avrà posto per due?
Che freddo! Siamo a sosta.Ma quanta neve, quanta!
Un pò ci riscalderanno quell’asino e quel bue.
Maria già trascolora,divinamente affranta
Il campanile scocca La Mezzanotte Santa.
E’ nato! E’ nato! Alleluja!
E’ nato il sovrano Bambino
La notte, che già fu sì buia
Risplende d’un astro divino.
Orsù, cornamuse, più gaie
Suonate; squillate, campane!
Venite, pastori e massaje,
o gente vicine e lontane!
Non sete, non molli tappeti,
ma, come nei libri hanno detto
da quattro mill’anni i Profeti,
un poco di paglia ha per letto
E’ nato! E’ nato! Alleluja!
E’ nato il sovrano Bambino
Per quattro mill’anni s’attese
Quest’ora su tutte le ore.
E’ nato! E’ nato il signore
E’ nato nel nostro paese!
Risplende d’un astro divino
La notte che già fu sì buja.
E’ nato! E’ nato! Alleluja!
E’ nato il sovrano Bambino
Alleluja! Alleluja!
Caro Gesù Bambino (poesia) Giuseppe Russo
Caro Gesù Bammino…..
Vide ‘sta vota qual’idea me vene!
Aggio scigliuto ‘na vranca ‘e guagliune….
‘n’aggio fatto ‘na specie ‘caravana!
Pe’ farme accumpagnà!..p’avè ‘na mana…
Quanno arrivo ‘a ddu Te…ca staie luntano!
Caro Gesù Bammino….
Si ‘o cunto torna e nun vaco sbagliato….
Quase duimila vote Tu sì nnato!
E pè tutt’ ‘e “Presepie” a mè vedute…
Pe’ chello c’’a “Capanna” hanno purtato…
Sa’ che riserva ‘e bene stà…astipato!
Caro Gesù Bammino
Visto c’’a parta Toia…’nterra straniera…
‘a gente more allerta ‘e…che manera!
Viecchie…Figliule…Mamme e Criature…
Se rejno striscianno ‘nfaccia ‘e mmure…
Cercanno pane e acqua e…stanno annuro!
Caro Gesù Bammino…
Cerca cunziglio ‘e genitore tuoie!
Piglia ‘sta rrobba!...siente ‘a voce mia…
Chiamma ‘e guagliune c’aggio purtato io..
E mannancella!..’mparale Tu ‘a via…
Chille so pure lloro figlie a Dio!
‘A nferta Anonimo
Che nferta mi farraie cara signora
Si ciente vota allora te chiammarria
Si ciente vota allora te chiammarria
Vergine bella e Madre di Dio
Vergine bella e Madre di Dio
Vulesse ca chiuvesse maccarune
Le prete della via ca se rattate
Le prete della via ca se rattate
Le prete della via ca se rattate
E l’acqua de lu mare vino annevate
E l’acqua de lu mare vino annevate
Damme la nferta e dammela bona
ca Dio ce la perdona
Nce la perdona a nuie a tuttequanne
Primma li piccirille e poi a li grandi
Primma li piccirille e poi a li grandi
Si nce la fai de noce e de castagne
Che puozza fa lu figlio Re de Spagna
Che puozza fa Lu figlio re de Spagna
Si nce la fai de noce e pignuole
Che puozza fa lu figlio mariuolo
Che puozza fa lu figlio mariuolo
Manname la nferta e mannela bona
ca Dio nce la perdona
Nce la perdona nuie e a tutti quanti
stienne lu tavulone e fatte annante
stienne lu tavulone e fatte annante
Buona Caccia Luigi Ottaiano
Chello ca manco cride te succere
‘o male vene appriesso e nun se vede
Miez’a nu bosco nun se trova frasche
Dio manna ‘a rogna a chi nun tene l’ogna
Dopp’’ tempesta adda venì ‘o bontiempo
chi s’accuntenta nun se ne vede bene
L’auciello ‘e Piererotta becco sano e scella rotta
‘A fine d’’o furchione se cagnaje l’uocchio p’’a coda
‘O stommaco vacante Nun vo chiù sta sentì
A famme nun se crede
Vutt’a ffà nott’e ghiurno fa venì sabbato juorne
‘A sciorta d’’a zitella quanno sposa tutta ‘a vonno Zeta Zè
Povero a mme c’aggio bisogno ‘e l’ate
C’’a malaciorta nun me vò lassà
Chi tene chiù denare va all’inferno
Chi ‘nu e tene nun se magna niente
Si vuò vede ‘nu figlio puveriello
li ‘a ffa piscaturiello ‘o acchiappauciello
L’auciello ‘e Piererotta becco sano e scella rotta
‘A fine d’’o furchione se cagnaje l’uocchio p’’a coda
‘O stommaco vacante Nun vo chiù sta sentì
A famme nun se crede
Vutt’a ffà nott’e ghiurno fa venì sabbato juorne
‘A miedeche e vammane male ‘a chi nce và dint’e mmane
’A prievete ‘e pagliette mai nun trovano arricietto
‘A casa d’o scrivano po ‘nce passa ‘o sacrestano
‘A sciorta d’’a zitella quanno sposa tutta ‘a vonno Zeta Zè
Piccerille (poesia) Rocco Galdieri
Piccerille che ghiate a scola
piccerille ca nun ce iate
si tenite chi ve cunzola
o site sule e abbandunate
Si tenite tutte vicine
o tenite tutte luntane
si sperit nannz’e vetrine
o ririte, sbattite e mmane
Piccerille pe stu Natale
nun sparate tracch e ne botte
appiacciate sule e bengale
comme sona a mezzanotte
Nun sapite Gesu c’a’ ritto
primm e scennere a ciele ntrerra
nun sparate stateve zitto
ca gia’ tant se spara nguerra
Cunto ‘e Natale E.A.Mario
Pure ‘e tre Magge antiche erano rre,
ma quanno le dicetteno: Venite;
è nato chi ce vò cuntente e aunite!
Cu tutt’’a gente ‘o jetteno a vedè
Ullero, Ullero si fosse overo!
Dicevano ‘e rre
Vedessemo fernì turmiente e pene,
e tutto ‘o munno se vulesse bene!
E tanta vote ca turnàino a ghì
cu ‘a neve, a vierno, aunite a Bettalemme
pure sapenno ca a Gerusalemme
ncroce a Gesù ‘o facetteno murì
Ullero, ullero è muorto, è overo
Ma ha ditto accussì:
Nu juorno hann’’a fernì turmiente e pene
E tutto ‘o munno s’hadd’’a vulè bene
Ce vanno pe’ destino pure mo:
‘a neve è rossa ‘e sango, e lloro vanno
‘Sti viecchie ‘e vinte sècule, chist’anno
sperano ancora, viecchie comme so
Ullero, ullero cu stu penziero
Ce tornano a ghi:
Nu juorno hann’’a fernì turmiente e pene,
e tutt’’o munno s’hadda vulè bene!
‘O pranzo e Razzullo Luigi Ottaiano
E finalmente mo’ n’aggio fatt’una
‘A sfizio de la garge de fortuna
Ven’’o mumento de lo sbramarraggio
E mette apposto chella famma ch’aggio.
So fatto mo pastore ‘e chillo viecchio
E m’ha contato pecore e lle capre.
E ncuollo m’ha posto stu bello pelliccione
Facennome pure canonico de bosche.
Nun voglio penzà cchiù alle miie disgrazie
E vi che maccarune che me sazio.
Nce sta pure pe mme chesta bella varrecchia
Ch’è chiena de nu vino d’uva vecchia.
Magnare forse aggio aspettato tanto
Nun saccio addò accummincià p’’o schianto.
Vedenno ‘o mmagnà me se è puosto nfestino
abballa ncuorpe a me lo mio stentino.
Pe ghionta ‘e ruotolo mio bel presutto
Fa strada all’ove, ‘o salame e ‘o strutto.
Rignenneme ‘a panza soprattutto
Finchè nun vide ‘e me scuppià del tutto
E tu, varrecchia mia, se non t’asciutto
Rimmani ca cu me finchè me schiatto.
Da mano mia tu via nun te ne scappi
Oh mio prezioso e nobile sciarappa.
E priparamme mo tutte ‘e ccose allegramente
Pe lo Messia c’aspettano l’Ebbrei.
‘A vocca, lengua, ‘o cannarone ‘e diente
‘o stommaco, ‘o fecato e affianco ‘e budelle
Mo sì ve consolate tutte quante
fratelli mie, magnamme e scialamme.
Di guardia trase tu pane e cicere pe primmo
e tu, ricotta mia apriesso tira ‘a cimma.
Nun voglio penzà cchiù alle miie disgrazie
E vi che maccarune che me sazio.
Nce sta pure pe mme chesta bella varrecchia
Ch’è chiena de nu vino d’uva vecchia.
Suonno e Natale (poesia) Pasquale Ruocco
Mm’aggio sunnato nu presebbio antico
Addò ‘e pasture erano tutte frate,
addò nu zampognaro npont’’o vico,
sunava ancora e ll’angele, ncantate,
pe’ ffore ‘e vasce d’’e chiù puverielle
spannevano ll’addore ‘e ncienzo fino
benedicendo tutt’’e guagliuncielle:
ognuno ‘e lloro nu Giesù Bammino.
Mm’aggio sunnato ciente Governante,
vestite ‘a Magi, nnanze ‘e ccase oscure,
addunucchiate comm’a tanta Sante,
facendo ‘ntennerì pè fino ‘e mmure.
E allora, ncopp’a stu presebbio mio,
tutt’’e pasture, cu deritte eguale,
hanno cantato: Gloria, gloria a Dio!
. . . Che suonno ch’aggio fatto stu Natale!
Quanno nascette Ninno S.Alfonso M.dè Liguori
Quanno nascette Ninno a Betlemme
era notte e pareva miezojuorno
Maje le stelle, lustre e belle, se vedèttero accussí
e 'a cchiù lucente, jette a chiammá li Magge a ll'Uriente.
De pressa se scetajeno ll'aucielle cantanno
de na forma tutta nova:
Pe' nsi' 'agrille, co' li strille,
e zompanno 'a ccá e 'a llá: - E' nato! E' nato! -
- decévano - lo Dio che nce ha criato! -
Co tutto ch'era vierno Ninno bello
nascettero a migliara rose e sciure
Pe' nsi' 'o ffieno, sicco e tuosto,
ca fuje puosto sott'a te, se 'nfigliulette
e de frunnelle e sciure se vestette.
Canzone de lo capo d’anno da Anonimo di Luigi Ottaiano
Nascette lu Messia avenne puveriello
Nu voje e n’asiniello pe vrasiere oj pe vrasiere
Nce fa venire a mente la luminosa stella
La bella grotticella e li pasture oj li pasture
Che gruosse e criature dall’angelo avvisate
Currevano priate e la capanna oj la capanna
E chi lle porta a manna c’’o ceste e c’’o panaro
E chi lo va adorare a faccia nterra oj faccia nterra
E da luntana terra pe ffino li tre magge
Cu traine e carriagge se partettero se ne partettero
Ch’appena che vedettero lu cielo alluminato
Dicettero era nato lu Messia oj lu Messia
Arode, re birbante trasette già ‘mpaura
Ca chella criatura lo spriorava lo spriorava
Chè la Madonna avette da cielo lu cunziglio
De ne fuì lu figlio tanno, tanno oj tanno, tanno
E sulo all’addonare ch’asciute so li ppigne
Te preje a chillu signe de Natale oj de Natale
Si prevete? Te manno l’aurio ca dimane
Si fatto parrucchiano o monsignore oj monsignore
E nuie perzò venimmo cu festa cante e suone
A purtà lu buono principio d’anno principio d’anno
Nce resta anze la voce pe ve cercà licenza
Dann’’a sta bona udienza la bona notte la santa notte
|
|
